1Sa 8 | TVK | STEP | Melele xa Samuel mei be mometu, xi teling horamue nan xalu mei lutehe moletin te lepisien tengan lalomal ni selen xil na mol-Isrel xil.

1 Samuel 8

Mol-Isrel Xil Lasis Iahova Tengan Vasa Suv Toto Tova mi Xil

1 Samuel 8:1-22

1 Melele xa Samuel mei be mometu, xi teling horamue nan xalu mei lutehe moletin te lepisien tengan lalomal ni selen xil na mol-Isrel xil. 2 Muimol nan, hisen Soel, e ngan xa dutou ni, hisen Abitsa. Xalu lutepol e taon tahal Bersiba. 3 E lutahusil kuh sexien hos na tamealu ti. Lube vat mani tang, e di lumaen moletin xil langgal xalu tengan lalotutou ni rin nae xil e melele te lepisien.

4 Misak ni, vat xil na mol-Isrel xil mei labe vituei e ba lapus Samuel e taon tahal Ramah. 5 Xil ba labiteni labit, “Samuel, xouk obe mometu tuei xiak. E horamue nam xalu, lutahusil ti sexien hos nam xil. Mak iaxa, mabit bos xa uhosei suv toto tova namem tengan ilaxat xamem ixoni kantri sav xil.”

6 E melele xa lasisi tengan vahosei suv toto tova xa ilaxat xil, Samuel pusi tamal ti, ma ba misis mi Iahova. 7 Ma Iahova biteni mini bitene, “Samuel, upol uhusil naha xa moletin xil di lasisuk ni. Vengan xa xil di latasinuk ti, e di lasin nou tengan ninave suv toto nae ti mun. 8 Taxeak, moletin xil ak di lapol ni minuk nggoni ngan taxa di latepol ni minou tetiamu. E melele xa nateleh rerat xil ra hal Isip mei duxoh xosali ak, vehakut latekavitou ni nou e di latemot mi hi sav xil. 9 Ma ha, uhusil nenemien nae. E bos xa usel xat xil ixeih e usep kil sexien xil na suv toto xa mei ilaxat xil.”

10 Di, Samuel ba bit vuol ni holesok xil xa Iahova tehiteni mini mi moletin xil xa mei latsisi ve suv toto tova. 11 Xi misep kila ni mi xil bit, “Ngan ak ihe sexien xil na suv toto xa mei ilaxat xamim. Xi imei ileh horamue namim xil lihe vaeen xil: rute xil ti likakao e rute xil liloh e hos san xil. Rute xil lixo kat xil xa hos xil lalihi e rute xil mun lihe mereketeh xil te kat xil ak. 12 Suv toto ak ipol ni rute xil mei lihe vat na moletin te vaeen xil xa moletin hanutap lu e hexalu mun (50) liti e vanute tei. E rute xil mun, lihe vat na ngan xil xa moletin taosen tei (1000) liti e vanute tei.

“Xi ileh rut horamue namim xil mun tengan ha lipol mini e naho san xil xa latellep. Xil litei tan san, e ti, lileh rerat anien teni ihe an. Xil ti lipol ni holesok nan xil te vaeen e te na kat nan xil. 13 Xi ileh atuli namim xil ha ti lipol mini. Xil ti lipol ni vokon nan xil, ti lipol ni anien an, e ti lihul beret an.

14 “Xi ileh tan namim xil xa bos itel urvatiei te grep e te olip samim xil, e isa ni sung mi eilep nan xil xa lipol e tim san. 15 Xi ileh taet te uit e grep samim xil tengan iseti iha mi eilep nan xil e mi moletin te polien nan xil mun. 16 Xi ileh slev namim xil itel buluk e dongki samim xil xa vexil bos mei lipol mini. 17 Xi ileh rerat rut sipsip e rut nani samim xil ixoni takis mei lihe san. ^{▼▼8:17 Takis ak nggoni taet xa iha mi suv toto.} E ipol ni xamim mun mei muxoni slev nan xil tang. 18 E melele xa melengien xil ak imei, xamim mungalelut tengan longpangasien xa suv toto di pol ni mi xamim vavus. Suv toto xa xamim tang mutehosei. E Iahova ihit nakil ti vari keien namim.”

19 E moletin xil labit linalong ti rae Samuel. Xil labiteni labit, “Tave ti neta xa imak, e xamem iemem bei pupu xa suv toto tova valaxat xamem. 20 Imak, ma mei muxoni kantri sav xil xa suv toto namem ita xa ti ilaxat xamem e ti itiamu ni xamem melele xa muhe vaeen xil.”

21 Melele xa Samuel milong naha xa moletin xil labiteni, xi ba bit mesen ni mi Iahova. 22 Ma Iahova biteni mini bit, “Pol ni vaxoni ngan xa xil iexil bei. Ling suv toto tova nae.”

Ma Samuel ba e bit mesen ni mi mol-Isrel xil. Di, misil xil ladilomun labe tim sae xil.